不時有會員會說：「呢一個小時評估教識我點玩D機，之後我跟住自己練就ok喇，我唔駛教練，教練好貴。」
呢句說話轉成地產商同建築師對話後會變成咁：「你講俾我知棟樓點起，我跟住個方法起就ok喇，我唔駛建築師，建築師好貴。」
（儘管假設個圖則無需建築師蓋章和政府批核）
建築師：「每個地方有唔同環境、土質、分區、地積樓面比率等等，我連個地盤都未做過勘察，我點知有啲乜嘢需要做呀？」
地產商：「就今日過嚟地盤勘察完就直接畫圖則俾我啦！」
建築師：「一日時間有乜可能寫到成份建築藍圖細節你睇？就講個地基都唔止一日啦！」「講真，就算我三日趕到份建築圖則俾你，整個建築過程冇我解釋比你（或你D判頭工人）聽你都你唔會明。」
地產商：「喂，笪地係我嘅，棟樓亦係我嘅，我會唔明？」
建築師：「如果你明白同識得起樓你應該一早起好啦，點會好似宜家咁仲係一笪爛地吖！」「你估望一望人哋個地盤然後跟住起就起得到咩！」
地產商：「你耍我呀？有幾難？」
建築師：「唔難我地做乜要攞牌？另外兜口兜面已經講左比你知，唔同地方有唔同嘅環境、地質、土壤，就情況而決定佢需要打個地基有幾深。一路起樓嘅時候一路會遇到唔同嘅問題，我哋要就住唔同嘅問題去尋找獨特嘅解決辦法。起樓唔係塑膠倒模咁樣一模一樣啤出嚟架！」
地產商：「咁最多一個月起貨有冇問題？」
建築師：「由構思、概念、研究、概要設計，設計發展，到製藍圖，投標，最後施工，要起棟樓閑閑哋最少都二至五年時間啦，如果你班工人勤力D咁咪快啲囉！但一個月時間連起個圖都未得。」
地產商：「咁我要起到一百層高嘅高功能大廈又要棟樓好靚仔有型嘅，你係咪保證做到先？
建築師：「得！但要棟樓起得高，地基就要打得深，相對時間會需要更多。我會儘量滿足你嘅需要，但設計同建築係我嘅專業，全盤過程希望由我做決定。」
地產商：「咁可唔可以平D？」
建築師：「起50層咪平D囉！建築冇海鮮價，Sorry。」
地產商：「但真係好貴！」
建築師：「係㗎！多謝讚賞。」
(特別感謝二哥Louis在建築學上之寶貴意見。）
Search